Miðstig - með jafnrétti, lýðræði og sköpun að leiðarljósi

15 Apr 2019

Við tökum stórt skref í skólaþróun næsta haust því þá verður 10 ára kjarni í Barnaskólanum fyrsti árgangur á nýju miðstigi skólans. Hjallastefnan sótti um miðstig með dyggum stuðningi foreldra og bæjarstjórn Garðabæjar samþykkti 4. apríl s.l. "tillögu skólanefndar um að verða við erindi Hjallastefnunnar um leyfi fyrir kennslu á miðstigi."

Byggt verður ofan á það góða starf sem fyrir er og börn og foreldrar þekkja en þó með nokkrum áherslubreytingum. Grunneiningin verður miðstigskjarni þar sem stúlkur og drengir starfa saman en skiptingar í undirhópa verði sveigjanlegar og taka í meira mæli mið af áhugasviði og námsstöðu hvers barns. Námið verður lotuskipt. Nám í listgreinum verður samofið bóknámi í listasmiðjum og stórum hópverkefnum. Nemendur munu hafa Chromebooks fartölvur til umráða í skólanum og þær notaðar markvisst til upplýsingaöflunar, þjálfunar og sköpunar. Við höldum áfram með þróunarverkefni í Singapore-stærðfræði sem lofar góðu. Allt okkar starf grundvallast sem fyrr á kynjanámskrá Hjallastefnunnar með jafnrétti, lýðræði og sköpun að leiðarljósi.